خرج و لـــم يعــــــد!!
جمله مشهوره اعتاد الناس كتابتها للابلاغ أو الاعلان عن الغائبين، لكن أنا ليا رأي تاني خااااااااااالص:
فبصفتي مواطنـــه مصريـــه بهديها للجنيــــــــــــــــــــه المصــري اللي بقى بيروح في ثانيه بل في فيمتو ثانيه!!
فبمجرد الخروج من المنزل ومع اول وسيلة مواصلات يبقى باااي بااااااااااااااي يــــــا جنيــه. ذلك الجنيه اللي كنت زمان وأنا صغيره لما أخده اقعد افكر هصرفه في ايه؟؟؟ واما اقرر اني ابعزقه كله وان شاء الله ما عن حد حوّش..... يبقى انا هجيب لنفسي حاجه حلوه بربع جنيه واعزم باقي افراد العائله بالباقي!!!
وكان الربع جنيه ده له خيارات متعدده...... يعني ممكن اجيب بيه اي حاجه حلوه تخطر في بالي:
مثلا ممكن اجيب بيه ايس كريم، اللي دلوقتي تلاقي منه في الاساطير بس اقل حاجه بنص جنيه. وكنت ممكن اجيب بيه كوز ذره محترم، اللي هو دلوقتي بيتباع بالاحجام واقل حجم منه مش هيكون اقل من نص جنيه، ولو عايز المحترم بتاع زمان اللي دلوقتي بيقولو عليه الجامبو يبقى مش هتدفع اقل من جنيه. وكمان بالربع جنيه كان ممكن اجيب شوكولاته ومش اي نوع لااااااااااااااااا ده النوع الممتاز كمان.
ياااااااااااااااااااااااه...... أيــــــــــــــــــــــام!!
كل ده لاحظوا أنا كنت بتكلم ع الربع جنيه مش الجنيه، الربع جنيه اللي دلوقتي لو اديته لشحات ممكن يدعي عليك بدل ما يدعيلك!! ومش بعيد يتخانق معاك ويشتمك!! ومش بعيد أبدا يبصلك بقرف ويقولك.....
"هو أنــــا بشحـــت منــك" !!!!؟؟؟
تلك هي الحقيقه المره في ظل الغلاء الفاحش المستبد، قــــاهر جيـــوب المصريين، ومحـطم قلـوب المرتبـات!!!
.....
والجدير بالذكر أيضا ان فيه شركات مبيهونش عليها تكسر بخــــاطر النــاس بردو وتـــزود سعـر السلعه، تقوم تعمل ايه؟؟؟؟؟ !!!!
تلاقيها سايبه السعر زي ما هو تماااام....... وتقلل في الكميه تمااااااااااام قوي. زي مثلا كيس المكرونه اللي كان زمااااااااااااااااان مكتوب عليه "الوزن الصافي 500 جرام" وبكل فخر وببنط معقول، وكمان شويه اما الاسعار تعلى وتعلى وتعلى تلاقي ياسبحان الله الكيس بردو زي ماهو نفس السعر وتأتي الفاجعه لما تبص في اخر الكيس خاااالص تلاقي مكتوب "الوزن الصافي 400 جرام" وهتلاقي البنط صغر كده...... عشان محدش ياخد باله!!
وبعدين كمان اما الاسعار تعلى وتعلى وتعلى تبص تلاقي البنط المكتوب بيه الوزن يكاد يكون غير مرئي...... "الوزن الصافي 350 جرام".... اوعى تبص!!!! انت هتقرا كمان وتشوف الوزن قد ايه!!؟؟
وبعدين بقى اخر ما يزهقوا يقولو هي جت علينا يروحو مقللين الكميه وكمان مزودين السعر.... "يعني هيبيعوا المكرونه بالواحده مثلا!!!"
وتلاقي السلع التانيه اللي بتتحط في أكياس أو علب تلاقيهم زودوا السعر بس يقولولك ايه بقى: "25% زيـــــــــاده"
ويعملوا فضايح بقى وتبقى قاعد منتش عارف تتفرج ع المسلسل كل شويه 25% زياده ...50% زياده... الحق العرض قبل ما يفوتك...
وتروح تلحق العرض اللي عمره ما هيفوتك تلاقي فعلا فيه 25% زياده وللا 50% زياده حقيقي فعلا.... بس نسيوا يزودا كلمتين في الاعلان..... "في الكيس!!!!".... أصلك هتلاقي الكيس طول حبتين بس فاضي من جوه.... أو العلبه هتلاقيها عليت حبتين كده وبردو طبعا فاضيه من جوه!!!
المهم انها زادت بالنسبه اللي قالوا عليها... ايه انت هتنهب!!! هيزودوا العلبه!! واللي جواها كمان!! ده انت طماع بشكل!!!!
واهم حاجه كانت مجال سخرية الجميع رغيف العيش الحلو الأمور المدور اللي كان ب 10 قروش ده وكان رغيف يعتبر رغيف يعني، دلوقتي ياعيني عليه!! بقى عامل زي الكيزر(على رأي أختي الصغيره)!!! ده حتى مش محصل الكيزر لان الكيزر منتفخ كده....أما الرغيف أبو بريزه ده مفيهوووووووووش خااااااااااااالص!!؟؟؟
أختي الكبيره بقى بتقولي ان الرغيف أبو بريزه ده بيفكرها باغنية "حـلـفــــنـــي" !!!!!!!
.........
المهم ان الجنيه الذي "خرج ولم يعد" لأهله -العملات الورقيه ذات القيمه- بقوا دلوقتي الاطفال بيغنوا له ويقولوا:
"بـابـا ادانـي جنيـــه..... بس أعمل بـيه ايــه؟؟؟؟ هو فـاكـرنـــي ايــه!!!!!!!"
خرج و لـــم يعــــــد!!