هو الشغل بقى حرام يامولانا؟!

وقفت وتنحت ووقعت م الضحك أما قال الجمله دي محمد هنيدي في فيلمه "وش اجرام" ..... هو الشغل بقى حرام يا مولانا؟؟؟!!!
فعلا شر البلية ما يضحك... ففي ظل البحث عن وظيفه يتوقف كل شئ فجأه.. وتلاقي نفسك عايش أحلام اليقظه.. وبيجيلك تهيأااااات الشغل... ويمكن تكلم نفسك في المرايه وانت بتدرب هتعمل ايه في الانترفيو بتاع النهارده؟؟؟ وأهلك وصحابك يقعدوا يدعولك.... "ربنا يوفقك يا بني... ربنا يجعل في وشك القبول" ......"ربنا يوفقك يا بنتي.. يارب الوظيفه دي تبقى من نصيبك"
وتروح الانترفيو يروحو ماسكين السي في بتاعك باحتقار ويبصولك من فوق لتحت ويقولولك بقرف :
"ايه ده... انت (FRESH GRADUATED) معندكش خبره خالص؟؟ يعععع؟!! لالا... احنا عايزين خبره "
هتجييييييييييييييييييييييييييب الخبره منين بس؟؟؟ مكل الناس عايزين خبره!!... لا حول ولا قوة الا بالله
"معلش يا بني ... معلش يا بنتي ... اتنازلو شويه وشوفلكو شغلانه تانيه حتى لو مش مجالك"
ويبدأ البحث عن وظيفه مش قد كده.. لدرجة انك ممكن تلجأ والعياذ بالله للقوى العامله.. ومش هتعجب بردو!!
....واحده معرفه (وبلاش فضايح) راحت هناك للقوى العامله فبتسأل الموظفه : "لو سمحت أنا سمعت ان فيه فرص عمل تبعكوا؟؟"
الموظفه : "مؤهلك ايه؟؟"
البنت : "بكالريوس......."
الموظفه...(كما وصفتها البنت)... برقت عينيها وبصت في اندهاش وتعجب وحسره
البنت : "طب أنا ليا واحده قريبتي بكالريوس...."
الموظفه : "يا بنتي الحاجات اللي هنا متنفعكوش... لا حول ولا قوة الا بالله... ربنا يفتحها عليكو يا بنتي"
............. فعلا حاجه تقطع القلب ..............
وتلاقي الواحد مننا (الخريجين الجدد... اليععع دول المؤهل العالي) ماشي في الشارع مبلم وشايل هم الدنيا على دماغه
والناس تعرفهم علطول....
واحد يقول.. "ماله ده يا عيني؟؟؟"
التاني : " تلاقيه مؤهل عالي"
الاول : " لا حول ولا قوة الا بالله "


ملحوظه : من فضلك صوت على الموضوع ده (بس من غير دوشه لو سمحت)